МУ-ын Ерөнхийлөгч Ц.Элбэгдоржийн БНХАУ-д хийсэн Төрийн айлчлал

Монгол Улсын Ерөнхийлөгч Цахиагийн Элбэгдорж 2010 оны 4-р сарын 28-аас 2010 оны 5 дугаар сар 4-ний өдрийг хүртэл БНХАУ-ын дарга Ху Жинтаогийн урилгаар тус улсад төрийн айлчлал хийлээ.

БНХАУ-д төрийн айлчлал хийж байгаа Монгол Улсын Ерөнхийлөгчийн айлчлалын сүүлчийн зогсоол нь ӨМӨЗО-ны Эрээн хот байлаа.
Ерөнхийлөгч Ц.Элбэгдоржийг Эрээн хотын намын хорооны дарга Тао Шүжүй, Эрээн хотын Засаг дарга Мэн Жиан Дун, дэд дарга Во Ган нар угтан авав.

БНХАУ-д төрийн айлчлал хийж байгаа Монгол Улсын Ерөнхийлөгч Ц.Элбэгдорж, Тэргүүн хатагтай Х.Болормаа нар ӨМӨЗО-ны Шилийн гол аймгийн харъяат, Баруун Сөнөд хошууны Эрээн нуур сумын малчин Лантуугийнд зочиллоо.

Монгол Улсын Ерөнхийлөгчийг Баруун Сөнөд хошууны удирдлага, малчид ард иргэд , эрхэм зочноо хүндэтгэн угтдаг монгол заншлаар идээ будаа, дуу хуурынхаа дээжээр талархан угтсан.

БНХАУ-д хийсэн төрийн айлчлалынхаа хүрээнд, Монгол Улсын Ерөнхийлөгч ӨМӨЗО-нд ажилласан. Энэ үеэр ӨМӨЗО-ны Намын Хорооны нарийн бичгийн дарга бөгөөд, ӨМӨЗО-ны АТИХ-ын БХ-ны дарга Ху Чуньхуатай уулзаж, Өвөр Монголын Их сургуульд зочилж, Монгол-Өвөр монголын ажил хэрэгч хүмүүсийн уулзалтанд оролцож, мөн салхин сэнсний “Вистас” үйлдвэртэй танилцсан юм.

Монгол Улсын Төрийн тэргүүний БНХАУ-д хийж байгаа айлчлал Хятад Улсын хэвлэл мэдээллийн хэрэгслийн анхаарлын төвд байна.
Монгол Улсын Ерөнхийлөгч Ц.Элбэгдоржийн БНХАУ-ын дарга Ху Жинтао, мөн тус улсын Төрийн Зөвлөлийн Ерөнхий сайд Вэнь Зябао нартай хийсэн уулзалт, Хятад Монголын бизнес форумын үеэр хэлсэн үгийн талаар өдөр тутмын “China Daily” “Ардын сонин” зэрэг сонинууд томоохон сурвалжлага нийтлүүлэв.

159 жилийн өмнө Лондон хотноо анх удаа тухайн үеийн Англи Улсын аж үйлдвэрийн хөгжил дэвшлийг дэлхий дахинд таниулах зорилгоор зохион байгуулагдаж байсан үзэсгэлэн 140 өдөр үргэлжилж, 6 сая хүн үзэж байлаа.
Түүхэн урт удаан хугацааны турш, дэлхийн олон оронд зохиогдож байсан Экспо, 1970 онд Японы Осака хотод дараагийнхаа шинэ амжилтыг тогтоож, 64 сая хүн үзэж байсан юм.

Энэ өдрүүдэд, дэлхий дахины анхаарлыг хамгийн ихээр татаж байгаа үйл явдлуудын нэг нь яахын аргагүй “Шанхай Экспо 2010” болж байна.
“Сайхан хот-Сайхан амьдрал” уриан дор зохиогдож байгаа Шанхай Экспо хөгжиж буй оронд болж байгаа анхны үзэсгэлэн болж байгаа юм.
2010 он гэхэд манай гаригийн хүн амын тал хувь нь хот суурин газар амьдарна гэсэн тооцоо байдаг.

Монгол Улсын Ерөнхийлөгч Ц.Элбэгдорж , БНХАУ-д дарга Ху Жинтао нарын албан ёсны хэлэлцээний дараа хамтын ажиллагааны зарим баримт бичгүүдэд гарын үсэг зурах ёслол болов.