Монгол Улсын Ерөнхийлөгчийн Тамгын газрын дарга Д.Баттулга, Хуулийн бодлогын зөвлөх Г.Ганзориг нар Улсын Дээд шүүхийн Ерөнхий шүүгч, Шүүхийн Ерөнхий зөвлөлийн дарга С.Батдэлгэртэй уулзав

Мэдээлэл бүртгэсэн: delgerdalai огноо: 2010-07-28

 2010 оны 7 дугаар сарын 22-ны өдөр Монгол Улсын Ерөнхийлөгчийн Тамгын газрын дарга Д.Баттулга, Ерөнхийлөгчийн Хуулийн бодлогын зөвлөх Г.Ганзориг нар Улсын Дээд шүүхийн Ерөнхий шүүгч, Шүүхийн Ерөнхий зөвлөлийн дарга С.Батдэлгэртэй уулзлаа.

 Уулзалтаар талууд Үндэсний Аюулгүй Байдлын зөвлөлийн 2010 оны 4 дүгээр сарын 15-ний өдрийн зөвлөмжөөр дэмжигдсэн “Шүүх эрх мэдлийн хүрээнд шинэтгэлийг гүнзгийрүүлэх хөтөлбөр”-ийг хэрэгжүүлэх үйл ажиллагааны талаар санал солилцон цаашид Улсын Дээд шүүх, Шүүхийн Ерөнхий зөвлөл болон Ерөнхийлөгчийн Тамгын газар хэрхэн хамтран ажиллах талаар харилцан ярилцав.

Тамгын газрын дарга Д.Баттулга, Ерөнхийлөгчийн Хуулийн бодлогын зөвлөх Г.Ганзориг нар Шүүхийн шинэтгэлийг гүнзгийрүүлэх, авлигыг таслан зогсоох, хүний эрх, эрх чөлөөг хамгаалах, шудрага ёсыг тогтоох, ардчилалыг бэхжүүлэх асуудлаар Ерөнхийлөгчөөс барьж буй бодлого, байр суурийн талаар танилцуулж энэхүү үйл ажиллагаанд Улсын Дээд шүүх, Шүүхийн Ерөнхий зөвлөл болон жирийн шүүгчдийн оролцоог идвэхжүүлэх шаардлагатай байна гэж Ерөнхийлөгч үзэж байгааг Ерөнхий шүүгч С.Батдэлгэрт мэдээллээ.